Podcast: Download (Duration: 7:50 — 9.6MB)
PANALANGIN NG BAYAN
Ika-20 Linggo sa Karaniwang Panahon
Martes
Manalangin tayo sa Diyos Ama para sa katatagan na mapaglabanan ang tuso ng materyal na bagay at kasiguruhan.
Panginoon, dinggin Mo ang aming panalangin.
o kaya
Panginoon, tulungan Mo kaming ituon ang aming mga puso sa Iyong kaharian.
Ang Simbahan nawa’y magbigay saksi sa halaga ng makalangit na Kaharian, manalangin tayo sa Panginoon.
Ang mauunlad na bansa nawa’y magbahagi ng kanilang likas na yaman sa mga mahihirap na bansa, at huwag nila silang pagsamantalahan, manalangin tayo sa Panginoon.
Ang mga Kristiyanong namumuhay sa karangyaan nawa’y maging matalino sa paggamit ng kanilang kayamanan ayon sa diwa ng pagbabahagi at pagmamahal, manalangin tayo sa Panginoon.
Sa mga matatanda, dukha, at maysakit nawa’y maipakita natin ang ating pagkalinga at habag, manalangin tayo sa Panginoon.
Ang mga yumao nawa’y makibahagi sa kayamanan ng Kaharian ng Diyos, manalangin tayo sa Panginoon.
Ama naming nasa Langit, pakinggan mo ang mithiin ng iyong bayan. Mapuno nawa kami ng karunungan ni Jesus, siya na nabubuhay at naghahari, kasama mo at ng Espiritu Santo magpasawalang hanggan. Amen.
Pages: 1 2
« Lunes, Agosto 19, 2024
Miyerkules, Agosto 21, 2024 »
{ 3 comments… read them below or add one }
PAGNINILAY: Ang ating Ebanghelyo ngayon ay pagpapatuloy sa ating narinig na pagpapahayag ni Hesus tungkol sa pagiging mayaman na nakita natin sa anyo ng mayamang binata (Ebanghelyo kahapon). Nakita natin kahapon kung paanong nilapitan si Hesus ng binatang ito at tinanong kung ano ang dapat gagawin upang makamit ang buhay na walang hanggan. Tugon sa kanya ni Hesus na kung tinupad ng lalaki ang mga Sampung Utos, ipamigay niya ang kanyang mga ari-arian at sumunod sa Panginoon, kaya’t malungkot na umalis siya. At dahil dito, nagsalita si Hesus na mahirap pumasok ang isang mayayamang tao sa Kaharian ng Langit, ngunit mas madali pang pumasok ang kamelyo sa butas ng karayom. Hindi po literal na makakapasok ang isang malalaking kamelyo sa maliit na butas ng karayom. Ito po ay tungkol sa paghahangad ng tao sa tunay na kaligayahan at kayamanang nakasalalay sa Kaharian ng Langit. Kaya’t ito’y panawagan sa pagsunod sa yapak ng Panginoon tungo sa buhay na walang hanggan. Ngunit ang magiging sakripisyo nito ay ang pagdaraan sa mga pagsubok ng buhay. At patuloy na nagsasalita si Hesus na kung sino man ang nag-iwan sa lupain, tahanan, at pati na mga kapamilya ay magkakamit ng kaligayahan sa kalangitan. Iyon nga ba ang gusto nating gantimpalaan kahit isasakrispiyo natin ang mga mahal natin sa buhay?
Makikita natin dito na mahirap sundin ang panawagan ni Hesus, subalit ang nais niyang ipahayag ay ang katatagan ng ating pananampalataya sa kanya at sa Diyos Ama. Hindi naman minasama ni Hesus ang ating mga pamilya at tahanan, subalit ang nais niya ay siya’y unang prioridad sa tawag ng pagsunod sa kanya. Hindi naman kinakailangang ibenta natin ang lahat ng mayroon tayo dahil alam ng Diyos na pinaghirapan natin ang mga ito sa edukasyon at trabaho, subalit dapat manatili tayong simple at mababa ang loob sa kabila ng mga kayamanan natin sa buhay. At matuto din tayong magbahagi ng iilang-ilang ari-arian at pagpapala sa ibang tao, lalung-lalo na ang ating mga buhay sa espirituwal na pangangailangan nila. Ito yung sinasabing “poor in spirit” o sa ibang salita “kababang-loob”.
Ito’y ang kababang-loob na ipinahayag ni Propetang Ezekiel sa mga prinsipe ng Tiro sa Unang Pagbasa na bagamat matalino at malalakas sila, mas makapangyarihan pa rin ang Panginoon na nagpapasya ng kamatayan at nagbibigay ng buhay.
Ang Pagbasa sa araw na ito ay isang paalala na ang lahat ng bagay sa ibabaw ng mundong ito ay nanggaling sa Diyos at walang hindi nakapangyayari sa kapangyarihan Niya. Sa panahon ni propeta Ezekiel inutusan siya ng Diyos na itigil ang pag-aastang diyos-diyusan ng namumuno sa Tiro at ang mga pagkamal ng katakot-takot na yaman sa pamamagitan ng masamang pamumuno bago niya sapitin ang hindi malirip na kaparusuhan. Sinasabi sa unang Pagbasa na kailanman ay hindi pwede mapantayan ang dunong at kapangyarihan ng Panginoong Diyos na sinasabi naman sa Salmo “Nasa pasya ng Maykapal ang buhay at kamatayan”.
Ang mahalagang aral sa Mabuting Balita ay sa kabila ng mga tagumpay at sa mga pinagkakaabalahan sa buhay ay may Diyos na pinanggalingan ng mga ito. Kailanman, ang kapangyarihan , yaman, at talento ay hindi ito pwede ipagpalit sa Diyos na Siyang may lalang ng lahat. Hindi masama ang magkaroon ng yaman sa buhay, katanyagan atbp kung gagamitin ang mga ito sa paggawa ng kabutihan. Ang nagpapasama sa tao ay ang paghahangad ng sobra sa sariling kapakanan lamang. Dito pumapasok ang pagsamba sa diyos-diyusan, sa pera, sa kapangyarihan, sa pagka-lunod sa tagumpay. Ang lahat ng mga gawaing ito ay naglalayo sa tao sa Diyos.
Inaanyayahan tayo ng mga pagbasa na maging daluyan ng biyaya para sa iba upang maging ganap ang pakikipag-relasyon natin sa Diyos. Ang pagaalay ng sarili para sa ikagiginhawa ng buhay ng iba, katulad ng pagpapakita ng habag, awa, at pag-ibig sa kapwa lalo higit sa mas nangangailangan ay kapara ng pagpupundar ng malaking kayamanan sa langit dito palang sa lupa. Nawa’y umiral sa atin ang pag-ibig at ang espiritu ng pagbibigayan, pagkaka-isa, at kasaganahan.
Lahat tayo ay may sari sariling yaman at talino.Ngunit ito ay mananatili lamang sa Mundo habang buhay tayo. Ang sabi ni Hesus, madadala natin Ang lahat ng ating yaman sa langit kung ating ipapamahagi ito sa ating kapwa na salat sa buhay. At sa langit natin matatamasa Ang buhay na walang hangan.Amen.