Podcast: Download (Duration: 6:28 — 4.6MB)
PANALANGIN NG BAYAN
Hulyo 22
Santa Maria Magdalena
Naranasan ni Maria Magdalena ang kagalakan ng pagtatagpo nila ni Jesus sa Muling Pagkabuhay nito. Nawa, ang maluwalhating pangyayaring ito ay maghatid ng kahulugan at pagbabago sa buhay natin at ating sabihin:
Panginoon, dinggin Mo ang aming panalangin.
o kaya
Sa pamamagitan ng Muling Pagkabuhay ni Jesus,
maging mapagpala ka sa amin, Ama.
Ang Simbahan ng Diyos nawa’y magpanibago kay Kristong Muling Nabuhay at ihatid ang kanyang mensahe ng pag-asa at pag-ibig sa buong mundo, manalingin tayo sa Panginoon.
Ang pamayanan ng mga mananampalataya nawa’y magpatotoo sa Muling Pagkabuhay ni Kristo sa pamamagitan ng kanilang halimbawa at patuloy na pagtalikod sa kasalanan, manalangin tayo sa Panginoon.
Ang mga nasa madilim na libingan ng kasalanan nawa’y makatagpo kay Jesus ng lakas at sigla sa pagbangon sa isang buhay ng katapatan sa Ebanghelyo, manalangin tayo sa Panginoon.
Ang mga nasisiraan ng loob dahil sa mga waring walang katapusang mga paghihirap nawa’y makatagpo sa Muling Pagkabuhay ng tapang na ipagpatuloy ang kanilang paghahanap ng higit na mabuting buhay, manalangin tayo sa Panginoon.
Ang mga lumisan na sa buhay na ito nawa’y mapatawad sa kanilang mga kasalanan ni Jesus na aming Manunubos, manalangin tayo sa Panginoon.
Ama, tanggapin nawa namin ang Mabuting Balita ng Muling Pagkabuhay ni Kristo at ang aming buhay sa hinaharap sa piling mo. Hinihiling naming ipagkaloob mo na maranasan namin ang bunga ng kanyang Muling Pagkabuhay sa aming sariling buhay. Hinihiling namin ito sa pamamagitan ni Kristo na aming Panginoon. Amen.
Pages: 1 2
« Linggo, Hulyo 21, 2024
Martes, Hulyo 23, 2024 »
{ 3 comments… read them below or add one }
PAGNINILAY: Ipinagdiriwang ng buong Simbahan ngayon ang Kapistahan ni Santa Maria Magdalena. Dati itong Paggunita, ngunit itinaas bilang Kapistahan dahil si Santa Maria Magdalena ay itinuturing na “Apostol ng mga Apostol”. Kilala siya sa Kasulatan na isa sa mga kababaihang malapit kay Hesus at naglingkod sa mga pangangailangan nito at ng mga Apostol. Sinasabi rin na pinalayas ni Kristo ang 7 demonyo mula sa kanya, na maaring nangangahulugang siya ay pinatawad sa kanyang mga kasalanan. Siya rin ay tumayo sa paanan ng Krus habang minamasdan ang Panginoong nabayubay, at sumama kina Jose ng Arimatea at Nicodemo sa paglilibing sa Panginoon. Narinig natin sa Ebanghelyo ang pagpapakita ng Muling Nabuhay na Panginoon kay Maria Magdalena. Marahil dahil sa kanyang katapatan, paglilingkod, at labis na pagmamahal kay Hesus, tumangis siya nang makita niyang wala na ang katawan ng Panginoon sa libingan. At sa di kalayuan ay nagpakita si Kristo sa kanya, na akala niya noon ay isang hardinero. Subalit nang tawagin ni Kristo ang kanyang pangalan, nakilala ni Maria ang Panginoon at lubos na natuwa. Subalit sinabihan siya ni Hesus na huwag nitong hawakin, bagkus ay ipabalita sa mga Apostol na ang Panginoon ay aakyat sa Diyos Amang nasa langit. Kaya buong kagalakan ibinalita ni Maria Magdalena na nakita niya ang Panginoong muling nabuhay.
Makikita natin sa kwento ni Santa Maria Magdalena ang pagtawag sa kanya upang maging alagad ni Hesus. Ang kanyang pagsisilbi upang paglingkuran ang ministeryo niya at ng mga Apostol ay tanda ng pagsisikap at pagtutulong sa misyon. Ang kanyang kagalakan sa Muling Pagkabuhay ay tanda na dapat nating ibalita ang magandang balita na si Hesus ay palaging buhay. Sa kabila ng mga problema at pagsubok ng ating buhay, na sinisimbolo ng puntod na walang laman, kailangan tayo’y mamuhay sa bagong pag-asang dala ni Hesus para sa atin at ipahayag sa ibang tao ang kanyang presensiya sa bawat isa.
MAGNILAY: Si Maria Magdalena ay tinaguriang Apostol sa mga Apostoles.
Ang apostol ay taong isinugo upang magpatotoo sa Panginoon at ipagpatuloy ang kanyang misyong ihatid ang Mabuting Balita sa iba. Nang mabuhay na muli ang Panginoon at umakyat sa langit pumili ang mga Apostoles ng papalit kay Hudas Iscariote. Isang kwalipikasyon ay ang pagiging saksi ng muling pagkabuhay bukod pa sa iba. Natatangi ang mga apostoles dahil sila ang pangunahing saksi sa Panginoong muling nabuhay at ang kanilang malapit o personal na ugnayan sa kanya. Si San Pablo bagama’t hindi kabilang sa opisyal na Labindalawang Apostoles ay Apostol din ang turing sa sarili dahil sa natatanging paraan nagpakita at nagpahayag sa kanya ang Panginoong muling nabuhay at siya’y isinugo.
Si Maria Magdalena ay nagkaroon ng espesyal na taguri na Apostol sa mga Apostoles dahil siya ang naunang nakasaksi ng pagkabuhay ng Panginoon at ang Panginoon mismo ang nagsugo sa kanya na ipaalam ito sa mga Apostoles. Isang karangalan sa isang babae pa ang maunang isugo sa mga Apostoles upang ipahayag na ang Panginoon ay buhay. Nilalarawan din ang malapit at personal na ugnayan niya sa Panginoon. Mga katangian ito ng tunay na apostol.
Madalas lang mapagkamalan si Maria Magdalena na dating makasalanan at babaeng mababa ang lipad. Ito ay dahil sa sinasabing pinalaya siya sa pitong demonyo. Napagkakamalan din siya na siya ang babaeng marumi na hinugasan ang mga paa ng Panginoon at pinunasan ng kanyang buhok sa Ebanghelyo ni San Lukas (7:37-38). Napagkakamalan din siya na si Maria ng Betania na kapatid nina Marta at Lazaro na nagpunas naman ng pabango sa mga paa ng Panginoon at pinunasan ng kanyang buhok sa Ebanghelyo ni San Juan (12:3). Pero hindi siya ang mga ito. Walang sinasabing marumi siyang babae o mababa ang lipad. Marahil ay mayroon siyang matinding karamdaman noon na napagaling ng Panginoon na siyang kahulugan ng sinasabing pinalaya siya sa pitong demonyo. Si Maria Magdalena ay malamang-lamang isang babaeng maykaya na naging tagapagtaguyod ni Hesus sa kanyang misyon at mga gawain.
Tayo man ay mga apostol na sinusugo ng Panginoon ngayon upang ipagpatuloy ang kanyang misyon at ihatid ang Mabuting Balita sa lahat. Magbigay saksi tayo na siya’y buhay at kumikilos sa buhay natin. Magkuwento tayo sa iba kung paano natin naranasan ang kanyang mapanghilom na pagmamahal. Ibalita natin sa lahat ang kanyang pagmamahal at pagliligtas.
MANALANGIN: Panginoon, kami nawa ay maging mga bibig mo na magpapahayag na ikaw ay buhay at nagmamahal at nagliligtas sa amin.
GAWIN: Maging kuwento ang buhay mo ng buhay na pagmamahal ng Diyos sa lahat.
PAGNINILAY
Pinili ni Hesus si Maria Magdalena, ang dating makasalanang babaeng ito, upang maging Kanyang unang saksi at unang mensahero ng Kanyang Pagkabuhay na Mag-uli. Sinasabi nito sa atin na si Hesus ay hindi nagtatangi sa atin dahil sa ating mga nakaraang kasalanan. Wala Siyang mahabang alaala na nagpapanagot sa atin sa mga nagawa natin sa nakaraan. Ang Kanyang pagpapatawad ay ganap kapag ibinigay at ito ay ganap na nagpapanumbalik sa atin sa biyaya kung tayo ay bukas dito.
Ilang beses, tulad ni Maria Magdalena, naririnig natin Siya ngunit hindi natin Siya nakikilala. Masyado tayong nababalot sa kung ano ang inaasahan nating maranasan mula sa Kanya, kung ano ang gusto nating makita, kung ano ang pinaniniwalaan nating nararapat, at nagiging bulag at bingi tayo kapag ang Kanyang tugon ay hindi umaayon sa ating inaasahan. Ang Diyos, gayunpaman, ay maaaring tumagos sa ating mga hadlang at tumawag sa bawat isa sa atin sa pangalan; sinisira Niya ang ating katigasan ng ulo at tinatawag ang tunay, orihinal na nilalang na nilikha Niya, na walang bahid ng kasalanan, pagdududa at pangungutya. Ang pakikipagtagpo kay Hesus ay nagpapaalala sa atin ng ating tunay na pagkatao, na kadalasang nawawala sa atin sa mga pagbabalatkayo ng buhay, ngunit laging naririto at kailanman minamahal Niya. Sa Kanyang tawag ng tunay na pag-ibig, ang ating puso at bawat puso, gaano man katigas, ay makakatugon lamang nang may kagalakan at panibagong pag-asa.
Panginoong Hesus, aming Tagapagligtas, tulungan Mo kaming makilala Ka sa aming mga kalungkutan at sa aming kagalakan.? Amen.
***