Podcast: Download (Duration: 7:35 — 9.3MB)
Lunes ng Ika-13 Linggo sa Karaniwang Panahon (II)
Amos 2, 6-10. 13-16
Salmo 49, 16bk-17. 18-19. 20-21. 22-23
Tinig ng D’yos dapat dinggin
kahit ng ayaw pumansin.
Mateo 8, 18-22
Subscribe to Awit at Papuri Communications YouTube Channel
Monday of the Thirteenth Week in Ordinary Time (Green)
UNANG PAGBASA
Amos 2, 6-10. 13-16
Pagbasa mula sa aklat ni propeta Amos
Ito ang sabi ng Panginoon: “Nagkasalang paulit-ulit ang mga taga-Israel. Sila’y tiyak na parurusahan ko, sapagkat dahil sa suhol, pinarusahan nila ang mga walang sala at ipinagbiling alipin ang di makabayad, kahit sa halaga ng isang pares na sandalyas. Niyuyurakan nila ang mga walang kaya at ipinagtutulakan ang mahihirap. Nakikipagtalik ang mag-ama sa iisang babaing nagbibili ng aliw anupa’t nalalapastangan ang aking banal na pangalan. Hinihigan nila sa tabi ng alinmang dambana ang balabal na sangla ng isang may utang. Sa templo ng kanilang Diyos ay nag-iinuman sila ng alak na binili ng salaping inagaw sa mga dukha. Nagawa pa nila ito sa akin matapos kong lipulin ang mga Amoreo, mga taong sintatangkad ng punong sedro at sintitigas ng punong ensina, na pinuksa kong lahat alang-alang sa kanila.
“Inilabas ko kayo mula sa Egipto, pinatnubayan sa ilang sa loob ng apatnapung taon at ibinigay sa inyo ang lupain ng mga Amoreo. Kaya, pahihirapan ko kayo, gaya ng kariton na di makalakad sa bigat ng dala. Hindi makatatakas ang matutuling tumakbo; manghihina pati ang matitipuno at di maililigtas ng mga kawal maging ang kanilang sarili. Walang tatamaan ang mga manunudla, di makaliligtas ang matuling tumakbo at di rin makatatakas ang mga nakakabayo. Ang pinakamatapang na mandirigma ay hubad na tatakas sa araw na iyon.” Ang Panginoon ang nagsabi nito.
Ang Salita ng Diyos.
SALMONG TUGUNAN
Salmo 49, 16bk-17. 18-19. 20-21. 22-23
Tinig ng D’yos dapat dinggin
kahit ng ayaw pumansin.
Bakit ninyo inuusal yaong aking mga utos?
At bakit ang paksa ninyo ay sa tipan natutungod?
Pag kayo ay tinutuwid, agad kayong napopoot,
at ni ayaw na tanggapin yaong aking mga utos.
Tinig ng D’yos dapat dinggin
kahit ng ayaw pumansin.
Ang makitang magnanakaw ang nagiging kaibigan,
at kung sinong mapang-apid siya ninyong kasamahan.
Mabilis ang inyong dila sa masamang sasabihin;
sa inyo ay bale wala ang gawang magsinungaling.
Tinig ng D’yos dapat dinggin
kahit ng ayaw pumansin.
Handa ninyong paratangan maging tunay na kapatid,
at kay daming kapintasang sa kanila’y nasisilip.
Kahit ito ay ginawa hindi kayo alumana,
kaya naman ang akala, kayo’t ako’y magkaisa;
ngunit ngayon, panahon nang kayo’y aking pagwikaan
upang inyong maunawa ang ginawang kamalian.
Tinig ng D’yos dapat dinggin
kahit ng ayaw pumansin.
Kaya ngayo’y dinggin ito, kayong ako’y hindi pansin,
kapag ako’y di dininig, kayo’y aking wawasakin;
wala kayong aasahang magliligtas sa hilahil.
Ang parangal na nais ko na sa aki’y ihahain,
ay handog ng pagsalamat, pagpupuring walang maliw;
akin namang ililigtas ang lahat na masunurin.
Tinig ng D’yos dapat dinggin
kahit ng ayaw pumansin.
ALELUYA
Salmo 94, 8ab
Aleluya! Aleluya!
Dinggin ninyong lahat ngayon
ang tinig ng Panginoon
sa loob na mahinahon.
Aleluya! Aleluya!
MABUTING BALITA
Mateo 8, 18-22
Ang Mabuting Balita ng Panginoon ayon kay San Mateo
Noong panahong iyon, nang makita ni Hesus ang makapal na tao sa kanyang paligid, iniutos niya sa mga kasama na maghandang tumawid sa ibayo. Nilapitan siya ng isang eskriba at sinabi sa kanya, “Guro, susunod po ako sa inyo saan man kayo pumaroon?” Sumagot si Hesus: “May mga lungga ang mga asong-gubat, at may mga pugad ang mga ibon, ngunit ang Anak ng Tao’y wala man lamang matulugan o mapagpahingahan.” Isa naman sa mga alagad ang nagsabi sa kanya, “Panginoon, maaari po bang umuwi muna ako upang ipalibing ang aking ama?” Ngunit sinabi sa kanya ni Hesus, “Sumunod ka sa akin, at ipaubaya mo na sa mga patay ang paglilibing ng kanilang mga patay.”
Ang Mabuting Balita ng Panginoon.
Pages: 1 2
« Linggo, Hunyo 30, 2024
Martes, Hulyo 2, 2024 »
{ 5 comments… read them below or add one }
PAGNINILAY: Sinisimulan ng ating Unang Pagbasa ang buhay at ministeryo ng mga propeta sa Lumang Tipan. Ngayon ay maririnig natin sa mga darating na araw si Propeta Amos, na mas kilala sa kanyang pagpapahayag tungkol sa katarungan para sa mga mahihirap at inaapi ng lipunan ng Israel. At narinig nga natin sa Pagbasa ngayon kung paanong ikinasusuklam ng Panginoon ang paulit-ulit na pagkakasala ng Israel dahil sa kanilang pagyuyurak sa mga mahihirap nilang kababayan at ang kanilang paglulustay at pag-aangkin sa kanilang mga pinaghirapang kayamanan. Kaya sinabi ng Diyos na pahihirapan sila katulad ng isang kariton na di makalakad o makabuhat. At makikita nga natin sa kasaysayan kung paanong nilusob at sinakop ng mga taga-Asyria ang Israel dahil sa kanilang di matapat na pamumuhay. Ngunit maririnig natin na sa kabila ng kanilang pagdaraanan, bubuksan muli ni Amos ang kanilang mga puso tungo sa daan ng kaligtasan, ang pagkakaroon ng malasakit at pakialam sa kani-kanilang kapwang mahihirap at naghihikahos. At ganun din ang Diyos na kahit nagagalit na siya sa pagpapahirap ng ginagawa ng Israel sa kapwa nilang mamamayan, nais niya pa rin ituwid ang pagkakamali ng bayan.
Ang Ebanghelyo ngayon na ayon kay San Mateo ay ang ating Ebanghelyo kahapon mula kay San Lucas. Ang mga dapat sumunod kay Hesus ay parang ‘di na natuloy. Ang dahilan dito ay dahil sa mga makamundong bagay, gawain, at pagnanasa na ayaw bitawin at iwanan. Una, ang isang tao ay nagsabi kay Kristo na susunod siya kung saan man ito magpunta. Subalit tugon ng Panginoon ay parang kinakailangan nating hiwalayin ang mga bagay na parang nagiging ugat ng ating ‘sarap ng buhay’ dahil ganun din ang nangyari ang Panginoon nang wala siyang lugar upang pahingahin ang kanyang ulo.
Pangalawa, may isang tao naman na nagdahilan na kailangan niyang ilibing ang kanyang ama. Subalit tugon sa kanya ni Hesus na patuloy na sumunod sa kanya, at ang patay na raw ang bahala na maglibing sa mga patay. Ibig sabihin nito ay may mga tinatawag tayong ‘hindi natapos na negosyo’ — “unsettled business” sa Ingles — na parang mga ritwal, kinaugalian, o gawain na bahagi na sa ating pang-araw-araw na pamumuhay. Subalit ang tunay na pagtugon sa tawag na magmisyon ay hindi palaging nakatuon sa mga okupadong kapakanan, na sa puntong wala na tayong oras para sa Panginoon. Huwag po sana nating idahilan sa kanya na masyado tayong okupado abala sa trabaho, dahil alam ni Hesus na kahit iilang katiting na sandali ay may panahon talaga tayo para sa kanya, lalung-lalo na sa pananalangin.
Mga kapatid, ang Diyos ay mabuti kung tayo ay magiging mabuti. At tayo rin nawa ay gawin nating prayoridad ang Diyos sa kabila ng ating mga inaasikasong obligasyon, sa trabaho man iyan o sa bahay lang. Ang lahat ng ating kinaabalahan at kinakapitan ay nawa’y ibigay natin sa Diyos upang panibaguhin niya ang ating puso at isip na ang ating ordinaryong buhay ngayon ay pagkakataong tayo’y tunay na magmisyon sa mga taong nakakasalamuhaan natin.
Ano ang aral at hamon ng ebanghelyo ngayon?
Kung nais nating makasunod kay Hesus, ay iwanan natin ang kasalalukuyang gawain. Katayin natin ang ating mga toro at igatonh ang mga gamit pang araro. Inig sabihin ay iwan mo at wag ng balikan ang dati mong klase ng pamumuhay sa dito sa lupa. Kung nais mong makasunod sa Diyos, ay baguhin mo amg iyong sarili alinsunod sa kautusan ng Diyos. Iwanan mo na ang masamang bisyo, talikuran mo na ang pagsasalita ng masama laban sa iyong kapwa, iwanan mo na ang pakiki-alam o pagtsitsismis sa ibang tao, iwaksi mo na ang pagnanasa sa hindi sa iyo, pagsisihan mo na at wag ng ulitin pa ang pangngalunya at pakiki-apid, patawarin mo na ang mga nakasakit sayo, At pag-ibig sa kapwa na lamang ang iyong iisipin, sasabihin at gagawin. Sa ganoong paraan ay maaari ka ng makasunod kay Hesus at makibahagi sa wagas na kaligayahan at kapayapaan na dulot nito.
MAGNILAY: Kung nadama mong tinatawag ka ng Panginoon upang magsilbi sa kanya tumugon ka ngayon na. Wala nang patumpik-tumpik pa. Kung hindi ngayon baka maging huli ka na. Sayang ang pagkakataon. Para makatugon matuto kang bumitiw sa lahat at magtiwala sa kanya. Hindi niya pababayaan sinuman o anumang maiiwan mo na mahalaga sa iyo. Kapag tinawag ka niya ang ibig sabihin ay talagang kailangan ka niya. Malaking kawalan kung mabibigo kang makatugon sa kanya. Ang ipagpaliban ang tugon ay katumbas na rin ng pag-hindi sa kanyang tawag.
MANALANGIN: Panginoon, gamitin mo ako ayon sa iyong kagustuhan at kasiyahan.
GAWIN: Huwag ka nang pakipot pa at lalong huwag kang paasa pa. Sumagot ka ngayon na!
MAIKLING PAGNINILAY:
Inaakay tayo ng ating Ebanghelyo ngayong araw sa isang tunay at ganap na pagsunod kay Hesus. Minsan ang akala natin ay nagkakamali ng pagtawag sa atin ang Diyos sapagkat marami tayong katangian na sa tingin natin ay hindi pasok sa mga katangian ng mga dapat na lingkod. Ngunit ipinapaalala sa atin ng Unang Pagbasa (Amos 2:6) na bagama’t minsang nagtatampisaw sa kasalanan ang bayan Niyang hinirang ay naging mapagpatawad ang Diyos at hindi kailanman sinabi na nagkamali ang Diyos sa pagtawag sa kanila. Ganoon din sa atin, hindi kailanman nagkamali ang Panginoon sa pagtawag sa atin kahit na tayo ay makasalanan at hindi karapatdapat. Naroon pa rin ang simple at personal na pagtawag sa bawat isa sa atin upang paglingkuran Siya kahit na sa mga simpleng bagay. Kaya hilingin nawa natin na tayo ay magkaroon ng taingang nakikinig, pusong nagmamahal, at pananampalatayang kayang talikdan ang lahat sa pagsunod sa tawag ng Panginoon.
Mabuti ang Diyos basta tayo ay mabuti. At nawa’y unahin natin ang Diyos kaysa sa ating mga pangako, sa trabaho man o sa bahay. Nawa’y ibigay natin sa Diyos ang lahat ng ating inaalala at pinanghahawakan upang mabago niya ang ating mga puso at isipan at gawing mga pagkakataon ang ating regular na buhay upang tayo ay tunay na magmisyon sa mga taong nakakasalamuha natin. Amen.