Podcast: Download (Duration: 8:05 — 7.8MB)
Huwebes ng Ika-3 Linggo sa Panahon ng Pagdating ng Panginoon
Isaias 54, 1-10
Salmo 29, 2 at 4. 5-6. 11 at 12a at 13b
Poong sa aki’y nagligtas,
ang dangal mo’y aking galak.
Lucas 7, 24-30
Subscribe to Awit at Papuri Communications YouTube Channel
Thursday of the Third Week in Advent (Violet)
UNANG PAGBASA
Isaias 54, 1-10
Pagbasa mula sa aklat ni propeta Isaias
“Ikaw ay umawit, O babaing baog, tinig mo’y Itaas,
O ikaw na hindi nakararanas ng hirap sa panganganak.
Ang magiging supling mo’y higit na marami kaysa may asawa.”
Gumawa ka ng mas malaking tolda,
habaan mo ang mga tali at dagdagan ang tulos.
Ikaw ay kakalat sa buong daigdig,
mababalik sa iyo, Israel, ang lupaing nasakop ng ibang bansa;
ang mga lungsod na ngayon ay wasak,
ay gagawing tirahan ng maraming tao.
“Huwag kang matakot
pagkat hindi ka na hahalayin uli
ni aaglahiin pa,
malilimot mo nang ika’y
naging taksil na asawa,
pati malungkot na alalahanin ng pagiging balo.
Sapagkat ang iyong naging kasintaha’y
ang may likha sa iyo,
Siya ang Makapangyarihang Panginoon;
ililigtas ka ng Diyos ng Israel,
Siya ang hari ng lahat ng bansa.
Israel, ang katulad mo ay babaing bagong kasal,
iniwan ng asawa, batbat ng kalungkutan.
Ngunit tinawag kang muli ng Panginoon
sa kanyang piling at sinabi:
“Sandaling panahong kita’y iniwanan
ngunit dahil sa tapat kong pag-ibig,
muli kitang kukupkupin.
Sa tindi ng galit nilisan kita sandali,
ngunit habang panahon kong ipadarama sa iyo ang tapat kong pagmamahal.”
Iyan ang sabi ng Panginoon na nagligtas sa iyo.
“Nang panahon ni Noe,
Ako ay sumumpang di na mauulit
na ang mundong ito’y gunawin sa tubig.
Gayun din sa ngayon,
iiwasan ko nang sa iyo’y magalit
at hindi na kita parurusahan uli.
Maguguho ang mga bundok at ang mga burol,
ngunit ang pag-ibig ko’y hindi maglalaho,
at mananatili ang kapayapaang aking pangako.”
Iyan ang sinabi ng Diyos na Panginoon,
na nagmamahal sa iyo.
Ang Salita ng Diyos.
SALMONG TUGUNAN
Salmo 29, 2 at 4. 5-6. 11 at 12a at 13b
Poong sa aki’y nagligtas,
ang dangal mo’y aking galak.
O Panginoon ko,
sa iyong ginawa, kita’y pinupuri’t ako’y iniligtas,
kaya kaaway ay di na nakuhang matuwa’t magalak.
Mula sa libingang
daigdig ng patay, hinango mo ako at muling binuhay;
ako, na kasama nilang napabaon sa kailaliman.
Poong sa aki’y nagligtas,
ang dangal mo’y aking galak.
Purihin ang Poon,
Siya ay awitan ng lahat ng tapat na mga hinirang.
Iyong gunitain ang mga ginawa ng Diyos na Banal,
ang kanyang ginawa ay alalahanin at pasalamatan!
Hindi nagtatagal
yaong kanyang galit, at ang kabutihan niya’y walang wakas.
Ang abang may hapis at tigmak sa luha sa buong magdamag,
sa bukang-liwayway ay wala nang lungkot, kapalit ay galak.
Poong sa aki’y nagligtas,
ang dangal mo’y aking galak.
Kaya’t ako’y dinggin,
Ikaw ay mahabag sa akin, O Poon, ako ay pakinggan,
mahabag ka, Poon! Ako ay dinggin mo at iyong tulungan.
Nadama ko’y galak nang iyong hubarin ang aking panluksa.
Sa pasasalamat sa iyo, O Poon, ay di magsasawa.
Poong sa aki’y nagligtas,
ang dangal mo’y aking galak.
ALELUYA
Lucas 3, 4. 6
Aleluya! Aleluya!
Daan ng Poong nar’yan na
t’wiri’t ihanda sa kanya.
Pagtubos n’ya’y makikita.
Aleluya! Aleluya!
MABUTING BALITA
Lucas 7, 24-30
Ang Mabuting Balita ng Panginoon ayon kay San Lucas
Pagkaalis ng mga sinugo ni Juan, si Hesus ay nagsalita sa mga tao tungkol kay Juan. “Bakit kayo lumabas sa ilang? Ano ang ibig ninyong makita? Isang tambong inuugoy ng hangin? Ano nga ang ibig ninyong makita? Isang taong may maringal na kasuutan? Ang mga nagsusuot ng maringal at namumuhay sa karangyaan ay nasa palasyo ng mga hari. Ano nga ba ang ibig ninyong makita? Isang propeta? Oo. At sinasabi ko sa inyo, higit pa sa isang propeta. Sapagkat si Juan ang tinutukoy ng Kasulatan:
‘Ipadadala ko ang aking sugo na mauuna sa iyo,
Ihahanda niya ang iyong daraanan.’
Sinasabi ko sa inyo: si Juan ang pinakadakila sa mga isinilang, ngunit dakila kaysa kanya ang pinakaaba sa mga taong pinaghaharian ng Diyos.”
Pinakinggan siya ng mga mamamayan, pati ng mga publikano. Ang mga ito’y sumunod sa kalooban ng Diyos nang pabinyag sila kay Juan. Subalit tinanggihan ng mga Pariseo at ng mga eskriba ang layunin ng Diyos sa kanila sapagkat hindi sila nagpabinyag kay Juan.
Ang Mabuting Balita ng Panginoon.
Pages: 1 2
« Miyerkules, Disyembre 14, 2022
Linggo, Disyembre 18, 2022 »
{ 3 comments… read them below or add one }
Ika labing anim ng Disyembre, ang umpisa ng simbang gabi o misa de gallo o misa de aguinaldo. Makikita na rin ang mga kabataan na nangangaroling. Pamaskong awit ang maririnig sa maraming dako. Na ang ibig sabihi’y papalapit na ng papalapit ang Pasko.
Kaya’t ang tema ng ebanghelyo ay ang paghahanda ni San Juan ng daraanan ni Hesus. Kapatid, handa ka na ba? Naituwid mo na ab ang liko liko mong landas, napatag mo na ba ang bako bako mong nilalakbayan. Suriin mo ngayon ang iyong sarili, nagnanasa ka p din ba sa hindi mo asawa at pag-aari, tsismosa ka p din ba naninira ng kapwa, hindi mo pa rin ba napapatawad ang iyong kaaway, kapatid o ang kapwa. Hindi ka pa rin ba namamahagi ng iyong biyaya sa walang wala, wala kanoa rin bang takot sa Diyos at patuloy ka pa ring sumusuway sa kanyang mga kautusan? Hindi pa huli ang lahat, magsisi tayo sa mga gawang masama, ihingi natin ito ng kapatawaran sa Ama, at sikapin ng matalikuran ang mga kabalastugan. Mahiya tayo sa Diyos, matakot tayo sa Diyos, sapagkat ano mang meron ka ngayon, komportable mana ang buhay mo ngayon, kilala ka at may posisyon ay sa isang iglap lamang ay kayang bawiin lahat ng Panginoon kung nanaisin nya.
Ang Adviento ay samantalahin upang magbago, manumbalik tayo sa Ama, papurihan sya at pasalamatan. Amen.
PAGNINILAY: Tayo ngayon ay nananabik na pumasok sa ikalawang bahagi ng Adbiyento, na kung saan mas bibigyang-diin ang mga huling araw ng Adbiyento mula ika-17 hanggang 24 ng Disyembre ang Unang Pagdating ni Kristo, ang kanyang Pagkakatawang-tao na siyang gugunitain natin sa Panahon ng Pasko ng Pagsilang. Kaya patuloy nating pinagninilayan ang hiwaga ng pagdating ni Kristo sa ating araw-araw na pamumuhay, upang maihanda natin ang ating sarili sa kanyang muling pagpaparito sa katapusan ng panahon.
Ang Unang Pagbasa ay isa na namang napakagandang pahayag ni Isaias tungkol sa kaginhawaan at aliw ng Panginoon sa kanyang bayang nagdurusa at nababalot ng paghihirap, na ang Diyos na kanilang tinalikuran ay tumatawag sa kanila na manumbalik sa kanya. Matatandaan na ang bayan ng Diyos ay sumuway sa kanya, kaya nga sinakupan sila ng mga taga-Babilonia, at sila’y tinapon sa pagkabihag sa Babilonia. Ngunit nagsalita ang Panginoon sa pamamagitan ni Isaias na ang Manlilikha ay tumatawag sa kanila na bumalik sa kanya, katulad ng pagtawag sa isang itinakwil na asawa pabalik sa pagmamahal sa kanyang kabiyak. Kaya nga ang Panginoon ay puno ng habag at pagmamahal sa kanyang mga hinirang at kinalulugdan. Dahil diyan, inaasahan sa atin na tayo’y tumugon at patuloy na sumikap na maging mabuti upang balang araw ay makamtan natin ang buhay na walang hanggan.
Ang Ebanghelyo ngayon ay karugtong ng Ebanghelyo kahapon, na kung saan isinugo ni San Juan Bautista na nakabilanggo ang kanyang dalawang alagad upang tanungin si Hesus na kung siya nga ang ipinahayag ni Juan na “Mesiyas na dumating”, o bagkus ay maghahanap na lang ng iba. Kaya’t ang naging tugon ng Panginoon ang mga magagandang kababalaghan na ginawa niya para sa mga tao. At narinig nga natin ngayon nang paalis na ang dalawang alagad ni Juan, tinanong ni Hesus ang mga tao kung ano o sino ang kanilang nakikita sa Ilog Jordan. At tinukoy ng Panginoon ang pagpaparangal at pagbibinyag ni Juan, na tinukoy rin ng Kasulatan na propetang maghahanda ng daan para sa pagdating ng Mesiyas. Kaya sa buong buhay ni San Juan Bautista, maski hanggang kamatayan ay naging mapagkumbaba siya at naging mapagmatyag sa kabila ng hantungan ng kanyang buhay sa kamay ng kasamaan nina Herodes at Herodias. Kaya nga si San Juan ang tinutukoy ni Kristo na sa lahat ng mga babaeng ipinanganak, ito ang propetang higit pa sa mga tinawag ng Diyos at nagpahayag ng kanyang mensahe. At binigyang-diin sa huli na ang mga mababa, mga nasa laylayan, mga dakilang kasalanan ang unang tumugon sa panawagan ni Juan na magsisi, magbalik-loob, at magpabinyag, kaysa sa mga pinuno ng mga Hudyo na masyado namang mapagmataas at puro paghahanap-butas ang inaatupag kay Juan Bautista (pati na rin kay Hesus).
Mga kapatid, tayo ay nalalapit na sa pagdiriwang ng dakilang misteryo ng Pagkakatawang-tao ng Panginoon sa Pasko ng Pagsilang. Ang pagdiriwang nito ay nagpapaalala sa atin kung paano si Hesukristong likas ng Diyos ay nagpakababa at nabuhay sa ating anyo (maliban sa pagkakasala) upang tayo’y kanyang samahan at sa huli ay kanyang iligtas mula sa kasalanan sa pamamagitan ng Pagkamatay sa Krus at Muling Pagkabuhay. At alam nating siya’y umakyat na sa langit, ngunit ang pangako niya ay kasama niya tayo palagi, at tayo’y umaasa sa kanyang maluwalhating pagbabalik upang tawagin niya tayong makahati sa mana ng buhay makalangit. Ito ang pinaghahandaan natin ngayong Adbiyento, na nawa’y isabuhay natin, alinsunod din sa panawagan ni San Juan Bautista na magsisi at magbago upang ang ating mga puso’t isip ay handa nang salubungin siya nang may pagtanggap at pagmamahal.
Peace be with you.
Ang unang pagbasa ay patungkol sa tunay at wagas na pagmamahal ng Diyos na sa kabila ng mga nagawa at pagtataksil natin sa Kanya ito inaanyayahan at binabalikan parin tayo ng Diyos, bakit? Kasi Sya ang may likha sa atin – mahal Nya tayo. Isang uri ng pagmamahal ng totoo. Sabi nga ng Divos ang mga bundok Ay magigiba ngunit hinde ang Kanyang pag ibig sa atin.
Ang ebanghelyo naman ay ang paglalarawan ni Jesus kay Juan Bautista na Sya ang tinutukoy sa mga kautusan. Kaya nga ngtanong si Jesus sino ba ang hinihintay nyo? Ang nakakalungkot mga publikano at karaniwan pa ang naniwala at sumunod at hinde ang mga pariseo
Mga kapatid, tunay nga na hinanda ni Juan ang pagdating ni Jesus – Ang pagdating ni Jesus ay ang pangako na sinabi ni propeta Isaias sa unang pagbasa.
Ganoon tayo kamahal ng Diyos – kahit na ano pa man pag daanan natin kung inisip mo at pakiramdam mo kinalimutan k ng Diyos hinde iyon mangyayari dahil sinabi mismo ng Diyos tunay ang pagmamahal Nya sa atin. Tandaan natin una tayo minamahal ng Diyos bago pa man natin Sya minahal. Tandaan natin mahal tayo ng Diyos kaya hinde Nya tayo gagawan ng masama o iwan tayo. Maaaring may nangyayari sa atin ngaun na hide natin nauunawaan pero hinde ibig sabihin pina kinalimutan na tayo ng Diyos. Mahal tayo ng Diyos iyan ang tandaan natin lagi dahil ang Diyos ay Pagibig at ang pagibig Ay ang Diyos. Dahil kung mahal mo ang Diyos sundin mo ang nais Nya hinde tulad ng mga Pariseo na hinde pinaniwalaan kahit si Juan na pinadala ng Ama. Pagnilayan natin ito, Amen.